Shugaban Jami’ar Khalifa Isyaku Rabiu (KHAIRUN), Farfesa Abdulrashid Garba, ya jagoranci tawagar jami’ar wajen kai ziyarar ban-girma ga Shugaban Jami’ar Bayero, Kano (BUK), Farfesa Haruna Musa, a wani bangare na shirye-shiryen gudanar da taron musamman da KHAIRUN ke shiryawa domin karrama shi.
A yayin ziyarar, Farfesa Abdulrashid Garba ya bayyana wa Shugaban BUK manufar taron da muhimmancinsa, yana mai cewa an shirya taron ne domin nuna godiya da karrama irin gudunmawar da Farfesa Haruna Musa ya bayar wajen bunkasa ilimi, tare da karfafa kyakkyawar alakar da ke tsakanin jami’o’in biyu.
Ya bayyana godiya ga BUK bisa irin goyon baya, jagoranci da hadin gwiwar da jami’ar ke bai wa KHAIRUN, wanda ya taimaka wajen karfafa harkokin ilimi da ci gaban jami’ar tun daga kafuwarta.
Shugaban KHAIRUN ya kuma nemi goyon bayan BUK wajen yada bayanai kan taron ta kafafen yada labaran jami’ar, musamman gidan rediyo da talabijin na BUK, domin kara wayar da kan jama’a da sauran masu ruwa da tsaki.
Da yake mayar da martani, Farfesa Haruna Musa ya taya mahukuntan KHAIRUN murnar irin nasarorin da jami’ar ta samu, tare da yaba wa Farfesa Abdulrashid Garba kan kokarinsa na karfafa hadin gwiwa tsakanin KHAIRUN da BUK.
Ya ce irin wannan alaka da hadin gwiwa na da muhimmanci wajen bunkasa ingancin ilimi, musayar kwarewa da ci gaban manyan makarantu a Najeriya.
Farfesa Haruna Musa ya kuma taya Bursar KHAIRUN, Dakta Najaatu Bala Rabiu, murnar karin girman da ake sa ran za ta samu, yana mai bayyana hakan a matsayin sakamakon jajircewarta da sadaukarwarta wajen yi wa jami’ar hidima.
Ya tabbatar wa mahukuntan KHAIRUN cewa BUK za ta ci gaba da ba jami’ar cikakken goyon baya da hadin kai, tare da bayyana godiyarsa bisa ziyarar da tawagar ta kai masa.
Ziyarar ta kara tabbatar da kyakkyawar alakar hadin gwiwa da zumuncin ilimi tsakanin KHAIRUN da BUK, yayin da jami’o’in biyu ke ci gaba da hada kai wajen bunkasa ilimi da inganta harkokin manyan makarantu.
